मुंबई ते नाशिक, शिर्डी आणि पुणे या शेअर टॅक्सींचे भाडे मार्गानुसार 50 ते 200 रुपयांपर्यंत वाढवण्यात आले आहे. हे सुधारित भाडे लागू करण्याची तारीख अद्याप ठरलेली नाही आहे. पुढील महिन्यापासून त्याची अंमलबजावणी होण्याची शक्यता आहे, असे आरटीओ सूत्रांनी हिंदुस्तान टाईम्सला सांगितले.

सुधारित भाडे चार्ट लवकरच दादर, बोरिवली, सायन इत्यादी विविध इंटरसिटी टॅक्सी स्टँडवर प्रदर्शित केले जातील.  टॅक्सी आणि ऑटो रिक्षांसाठी बी सी खटुआ पॅनेलने तयार केलेल्या सूत्राच्या आधारे भाडे सुधारणेला मान्यता देण्यात आली. या महिन्याच्या सुरुवातीला, मुंबई महानगर प्रदेश परिवहन प्राधिकरण (MMRTA) ने शेअर काळ्या-पिवळ्या नॉन-एसी टॅक्सी आणि या तीन मार्गांवर धावणाऱ्या निळ्या-सिल्व्हर एसी टॅक्सींच्या भाड्यात सुधारणा करण्यास मान्यता दिली.

एसी टॅक्सी प्रवासासाठी, मुंबईहून जाणाऱ्या प्रवाशांना नाशिकसाठी 100 अधिक आणि शिर्डीसाठी 200 अधिक मोजावे लागतील, तर पुण्याला जाणाऱ्या एसी आणि नॉन-एसी टॅक्सी प्रवासासाठी त्यांना 50 जादा मोजावे लागतील. 

मुंबई-नाशिक आणि मुंबई-शिर्डी मार्गावरील एसी टॅक्सींचे सुधारित भाडे सध्याच्या 475 आणि 625 ऐवजी अनुक्रमे 575 आणि 825 असेल. मुंबई-पुणे मार्गावरील नॉन-एसी टॅक्सींचे भाडे 450 ऐवजी 500 असेल आणि AC टॅक्सींसाठी ते 525 ऐवजी 575 असेल.

मुंबई-पुणे टॅक्सी मार्ग 155 किमी लांबीचा आहे, तर मुंबई-नाशिक आणि मुंबई-शिर्डी अनुक्रमे 175 किमी आणि 265 किमी लांबीचा आहे. एमएमआरटीएने तीन वर्षांपूर्वी मुंबई-पुणे मार्गावरील टॅक्सी भाडे सुधारित केले, परंतु मुंबई-नाशिक आणि मुंबई-शिर्डी या मार्गावरील टॅक्सी भाडे सप्टेंबर 2013 पासून अपरिवर्तित राहिले.

हेही वाचा

प्लॅटफॉर्म गर्दीमुक्त होणार, रेल्वेचा महत्त्वाचा निर्णय

मोनो रेलच्या फेऱ्यांमध्ये वाढ होण्याची शक्यता