नववर्षाच्या तोंडावर केंद्र सरकारने अनेक वस्तूंवरील जीएसटी दर कमी करून मोठा दिलासा दिला अाहे. शनिवारी नवी दिल्ली येथे पार पडलेल्या ३१ व्या जीएसटी परिषदेच्या बैठकीत २८ टक्के असलेला जीएसटी १८ टक्के अाणि १८ टक्के असलेला जीएसटी १२ अाणि ५ टक्के करण्याची घोषणा अर्थमंत्री अरूण जेटली यांनी केली. जीएसटी घटवल्यामुळे सिनेमाचं तिकीट, टीव्ही, कम्प्युटर स्वस्त होणार अाहे. नवे दर १ जानेवारीपासून लागू होणार अाहेत. जीएसटी कमी केल्यामुळे सरकारवर ५५०० कोटी रुपयांचा बोजा पडणार अाहे.
जीएसटी परिषदेची बैठक झाल्यानंतर जेटली यांनी पत्रकार परिषदेत जीएसटी कपातीची माहिती दिली. एकूण ३३ वस्तूंवरील जीएसटी दर कमी करण्यात अाला अाहे. १७ वस्तू आणि ६ सेवांवर अाधी जीएसटी १८ टक्के होता. हा दर अाता १२ किंवा ५ टक्के करण्यात आला आहे. तर कॉम्प्युटर, टीव्ही (३२ इंच), टायर्स, पॉवर बँक या वस्तूंवरील जीएसटी २८ टक्क्यांवरून १८ टक्के केला आहे. तसंच ३१ मार्च २०१९ पर्यंत जीएसटी रिटर्न भरल्यास कोणताही दंड आकारला जाणार नसल्याचाही निर्णय घेण्यात अाला.
Share
Tweet
