रेल्वे स्थानकांवरील आणि गाड्यांमधील अन्न व केटरिंग सेवा एलपीजी तुटवड्यामुळे तात्काळ प्रभावित होणार नाहीत, असे रेल्वे अधिकाऱ्यांनी सांगितले. पुरवठा साखळी अशा प्रकारे कार्यरत आहे की त्याचा परिणाम झाला तरी तो पुढील १५ ते २० दिवसांनंतर जाणवू शकतो.

“केटरिंग सेवांवर काही प्रमाणात परिणाम होऊ शकतो. मात्र आम्ही शक्य ते सर्व प्रयत्न करत आहोत आणि रेल्वे बोर्डाच्या पुढील मार्गदर्शक सूचनांची प्रतीक्षा करत आहोत,” असे एका वरिष्ठ अधिकाऱ्याने सांगितले.

इलेक्ट्रिक स्वयंपाकाची सुविधा

भारतीय रेल्वेने आधीच जीवाश्म इंधनावर अवलंबून राहणे कमी करण्याचा निर्णय घेतल्यामुळे सध्याच्या परिस्थितीत काही प्रमाणात संरक्षण मिळाले आहे. सुमारे पाच वर्षांपूर्वी रेल्वेने पँट्री कारमध्ये तसेच सर्व रेल्वे परिसरात एलपीजी वापरण्यास बंदी घातली होती. त्यानंतर टप्प्याटप्प्याने इलेक्ट्रिक कुकिंग इन्फ्रास्ट्रक्चर उभारले जात आहे.

“हो, आमच्याकडे सध्या काही प्रमाणात बफर आहे. मात्र बेस किचनमधून गाड्यांमध्ये पुरवले जाणारे अन्न आणि काही स्टॉलवरील पुरवठ्यावर परिणाम होऊ शकतो,” असे अधिकाऱ्याने सांगितले.

सुभाष गुप्ता, यात्री संघ, मुंबई
“सरकारने भारतीय रेल्वेला सवलती देऊन त्यांच्या स्वयंपाकगृहांसाठी आवश्यक तेवढा एलपीजी पुरवठा कायम ठेवायला हवा. गरीब प्रवाशांवर त्याचा कोणताही परिणाम होऊ नये.”

रमेश मेश्राम, खासगी बस ऑपरेटर
“खरं सांगायचं तर रेल्वेतील जेवण बंद झालं तर ती चांगलीच गोष्ट ठरेल. प्रवाशांना त्यांच्या किचन आणि कॉन्ट्रॅक्टरपासून सुटका मिळेल. कोणाला त्यांचं जेवण हवंय?”

शेरी अटवाल, रोजचा प्रवासी
“संकटाच्या काळातही स्थानकांवर खाण्यापिण्याची सुविधा मिळू शकते हे चांगलं आहे. काही स्थानकांवरील स्नॅक्स खूप चविष्ट असतात. मात्र शिजवलेल्या जेवणाबाबत अनेकदा तक्रारी असतात.”

केटरिंग कंत्राटदार
“स्नॅक्स मिळत राहतील, पण संकट लांबल्यास शिजवलेल्या जेवणावर मोठा परिणाम होऊ शकतो. गाड्यांमध्ये दिले जाणारे बहुतेक जेवण बेस किचन आणि क्लाऊड किचनमधून येते, आणि ते एलपीजी किंवा पीएनजीवर चालतात. पुरवठा कमी झाला तर केटरिंग सेवांवर परिणाम होऊ शकतो.”

शैलेश गोयल, माजी सदस्य, नॅशनल रेल्वे यूजर्स कन्सल्टेटिव्ह कमिटी
“तुटवड्याचा भार प्रवाशांवर टाकून दरवाढ करू नये. रेल्वेतील जेवण हा प्रवासाचा महत्त्वाचा भाग आहे. त्यात कोणतीही तडजोड होऊ नये. रेल्वेने बेस किचन कंत्राटदारांना पर्यायी इंधन वापरण्याचे निर्देश द्यायला हवेत.”

९९.४ टक्के विद्युतीकरण

रेल्वे गाड्यांच्या संचालनावर मात्र कोणताही परिणाम होणार नाही, कारण रेल्वेच्या बहुतांश गाड्या आता विजेवर चालतात. संपूर्ण डिकार्बनायझेशनचे लक्ष्य ठेवत भारतीय रेल्वेने सुमारे ९९.४ टक्के मार्गांचे विद्युतीकरण पूर्ण केले आहे. त्यामुळे मुख्य मार्गांवरील बहुतांश डिझेल इंजिनांची जागा इलेक्ट्रिक इंजिनांनी घेतली आहे.

हेही वाचा

गॅस टंचाईवर केंद्र सरकारचा मोठा निर्णय