मुंबई महापालिकेच्या उपनगरीय रुग्णालयांमध्ये एमआयसीयूचे विभाग सुरु करण्यात आले असले तरी प्रत्यक्षात या विभागांमध्ये डॉक्टरच उपलब्ध नाहीत. त्यामुळे डॉक्टरांअभावी रुग्णांची होणारी हेळसांड लक्षात घेऊन आता खासगी डॉक्टरांची सेवा घेण्याचा निर्णय महापालिकेने घेतला आहे. यासाठी १२ उपनगरीय रुग्णालयांमधील आयसीयू विभागांच्या देखभालीचं कंत्राट खासगी संस्थांना दिलं जात असून या संस्थांच्या माध्यमातून या विभागात खासगी तज्ज्ञ डॉक्टरांसह आयसीयू सेवा उपलब्ध करून दिली जाणार आहे.
मुंबई महापलिकेच्या १२ उपनगरीय रुणालयांमध्ये एमआयसीयू विभागात २०० बेड्स उपलब्ध आहेत. त्यासाठी या सर्व एमआयसीयू विभागात २४ तास डॉक्टर उपलब्ध असणं आवश्यक आहे. परंतु महापालिकेकडे तेवढ्या प्रमाणात डॉक्टर नसल्यामुळे आता या विभागासाठी खासगी संस्थेच्या माध्यमातून डॉक्टर उपलब्ध करून देण्यात येणार आहेत.
या १२ रुग्णालयांमध्ये स्पर्धात्मक निविदा व्हावी यासाठी प्रत्येक ३ रुग्णालये याप्रमाणे ४ गट तयार करून त्याप्रमाणे निविदा मागवण्यात आल्या. परंतु प्रत्यक्षात या १२ रुग्णालयांपैकी ९ रुग्णालयांमधील एमआयसीयू विभागात डॉक्टरांची तत्सम सेवा देण्याच्या कामांसाठी जीवन ज्योत चॅरीटेबल ट्रस्ट ही पात्र ठरली आहे.
क्रिटीकल केअर असोशिएट्सला दोन रुग्णालये आणि साई समृद्धी हॉस्पीटलला एका रुग्णालयाचे काम मिळालं आहे. या सर्व रुग्णालयांमधील आयसीयू सेवांसाठी सुमारे ३१ कोटी रुपये खर्च केले जाणार आहे. यासाठी प्रत्येक दिवशी प्रति बेडसाठी १७०० ते २२०० रुपये एवढे खर्च केले जाणार आहे.
हेही वाचा-
टी.बी. रुग्णांना दरमहा ६३१ रुपयांचा पौष्टिक आहार
महापालिका रुग्णालयेही आता इस्कॉनच्या ताब्यात