प्रसिद्ध ज्योतिषी बेजान दारुवाला यांचं कोरोनामुळं निधन

प्रसिद्ध ज्योतिषी बेजान दारुवाला यांचं कोरोनाची लागण झाल्याने निधन झालं आहे. अहमदाबाद येथील खासगी रुग्णालयात त्यांनी अखेरचा श्वास घेतला. ते ९० वर्षांचे होते. एका आठवड्यापासून त्यांना रुग्णालयात दाखल करण्यात आले होते. त्यांना श्वास घेण्यास त्रास जाणवत होता. अखेर शुक्रवारी त्यांचा मृत्यू झाला. 

गुजरातचे मुख्यमंत्री विजय रुपाणी यांनी ट्विट करुन यासंदर्भातील माहिती दिली. बेजान दारुवाला हे सुप्रसिद्ध ज्योतिषी होते. त्यांचा जन्म ११ जुलै १९३१ ला झाला होता. पारशी समाजाचे असूनही ते गणपतीचे भक्त होते. पारंपरिक ज्योतिष, पाश्चिमात्य ज्योतिष, टॅरो कार्ड, अंकशास्त्र, हस्तरेखा शास्त्र या विषयांमध्ये त्यांचा गाढा अभ्यास होता. अनेक वृत्तपत्रं, टीव्ही चॅनेल्स यावर ते भविष्य सांगत. 

ते गणपतीचे कट्टर भक्त होते.  त्यांनी अनेक वर्तमानपत्रे व प्रकाशने यासाठी स्तंभही लिहिले होते. नरेंद्र मोदी, मोरारजी देसाई, अटलबिहारी वाजपेयी आणि इतर बरीच लोकप्रिय व्यक्तींच्या भविष्याचा अंदाज दारूवाला यांनी वर्तविला होता.