भारताचा माजी कर्णधार आणि अंडर १९ क्रिकेट टीमचा मुख्य प्रशिक्षक ‘द वाॅल’ याची भारतीय क्रिकेट नियामक मंडळा (BCCI)ने राष्ट्रीय क्रिकेट अकादमी (NCA)चा प्रमुख म्हणून निवड केली आहे. टीम इंडियाच्या भविष्याच्या दृष्टीकोनातून हा एक महत्त्वाचा निर्णय मानला जात आहे. या निर्णयाची माहिती आयसीसी (ICC)ने ट्विट करून दिली आहे.
बंगळुरुमध्ये असलेल्या राष्ट्रीय क्रिकेट अकादमीचा कायापालट करण्याच्या तयारीत बीसीसीआय आहे. तरुण खेळाडूंना क्रिकेटचे योग्य धडे मिळावेत यासाठी हा निर्णय घेण्यात आला आहे.Rahul Dravid has been named head of cricket at the National Cricket Academy in Bengaluru.
— ICC (@ICC) July 8, 2019
READ ⬇️ https://t.co/bSntTVPqI5
या अकादमीत १९ वर्षांखालील युवा खेळाडूंना हेरणं त्यांना तसंच प्रशिक्षक, सहाय्यकांना मार्गदर्शन करणं, त्यांच्याकडून सराव करून घेणं ही भूमिका द्रविड पार पाडणार आहे. राष्ट्रीय महिला व पुरुष संघांसोबतही राहुल द्रविड काम करणार आहे. भारत अ, अंडर-१९ व अंडर-२३ वर्षांखालील संघांच्या जडणघडणीतही द्रविडचा हातभार असेल. याचसोबत राहुल द्रविडकडे बीसीसीआयशी संलग्न असणाऱ्या क्रिकेट अकादमींच्या प्रशिक्षकपदाची नेमणूकीचे अधिकारही देण्यात आले आहेत.
भारतीय संघातील दुखापतग्रस्त खेळाडू वैद्यकीय सल्ल्यासाठी राष्ट्रीय क्रिकेट अकादमीत येतात. इथं प्रशिक्षित डॉक्टर आणि फिजीओथेरपिस्ट खेळाडूंच्या फिटनेसची चाचणी घेतात. त्यामुळे भारतीय संघ व्यवस्थापनाला यासंदर्भातील अहवाल सोपवण्याची जबाबदारीही द्रविडच्या खांद्यावर असणार आहे.
भारतीय संघातील युवा खेळाडू पृथ्वी शॉ, मयांक अग्रवाल, हनुमा विहारी, विजय शंकर यांची कारकीर्द घडवण्यात द्रविडचा मोठा वाटा आहे. द्रविडच्या मार्गदर्शनाखालीच पृथ्वी शॉच्या भारतीय क्रिकेट संघाने १९ वर्षाखालील क्रिकेट विश्वचषक स्पर्धा जिंकली होती.