भीम आर्मीचे संस्थापक चंद्रशेखर आझाद यांना पुणे विद्यापीठ इथं सभा घेण्यास परवानगी द्यावी, अशी मागणी एक याचिकेद्वारे भीम आर्मीकडून मुंबई उच्च न्यायालयात रविवारी दाखल करण्यात आली होती. या याचिकेवर सोमवारी सकाळी सुनावणी झाली असून न्यायालयाने सभेस परवानगी नाकारली आहे. त्यामुळे आता पुण्यात आझाद यांची सभा होणार नाही हे स्पष्ट झालं आहे. मात्र आझाद यांना कोरेगाव भीमामध्ये जाण्यास परवानगी देत न्यायालयाने आझाद यांना थोडाफार दिलासा दिला आहे.
महाराष्ट्र दौऱ्यावर असलेल्या आझाद यांना मुंबई पोलिसांनी नजरकैदेत ठेवत त्यांच्या वरळीतील सभेला परवानगी नाकारली होती. आझाद २ दिवस नजरकैदेत असतानाच भीम आर्मीच्या कार्यकर्त्यांचीही धरपकड पोलिसांनी केली. पुण्यातील सभेलाही पोलिसांकडून परवानगी मिळत नसल्याने शेवटी आझाद यांनी न्यायालयात धाव घेतली. नजरकैदेतून सुटका, सभेस परवानगी आणि कोरेगाव भीमाला जाऊ देण्याची मागणी त्यांनी याचिकेद्वारे केली.
या याचिकेवर सोमवारी सुनावणी झाली असून न्यायालयाने सभेस परवानगी नाकारली आहे. न्यायालयाने सुनावणीसाठी पुणे पोलिसांनाही हजर राहण्याचे आदेश दिले होते. त्यानुसार सोमवारी पुणे पोलिसांनी न्यायालयात हजर राहत आझाद नजरकैदेत नाहीत वा त्यांना अटकही करण्यात आलं नसल्याचं सांगितलं. सभेस न्यायालयाने नकार दिला असला तरी आझाद यांना कोरेगाव-भीमा इथं जाण्यास परवानगी दिली आहे.
न्यायालयाचा निर्णय आम्ही मान्य करतो. त्यानुसार पुण्यात सभा होणार नाही. पण २ जानेवारीनंतर महाराष्ट्रात आझाद यांची सभा होईल, अशी प्रतिक्रिया भीम आर्मीचे महाराष्ट्र प्रमुख अशोक कांबळे यांनी 'मुंबई लाइव्ह'शी बोलताना दिली आहे. कोरेगाव-भीमा इथं जाण्यापासून एका सच्च्या आंबेडकरवाद्याला रोखता येत नाही. हेही न्यायालयाच्या निर्णयामुळे स्पष्ट झाल्याचं मत त्यांनी व्यक्त केलं आहे.
हेही वाचा-
चंद्रशेखर आझाद पुण्याला रवाना, पण पुण्यात सभा नाही
आझादच्या नजरकैदेचे ४८ तास, सभेसाठी न्यायालयात धाव
Share
Tweet
