मनिषा म्हैसकर पर्यावरण विभागाच्या प्रधान सचिव म्हणून कार्यरत

पर्यावरण विभागाच्या प्रधान सचिव म्हणून मनिषा म्हैसकर यांनी मंगळवार २१ जुलै रोजी पदभार स्वीकारला. मनिषा म्हैसकर या १९९२ साली भारतीय प्रशासकीय सेवेत रुजू झाल्या. त्यानंतर त्यांनी राज्यात विविध विभागात कामकाज केलं आहे. (ias manisha mhaiskar took a charge of principal secretary of environment department)

बदलत्या हवामानाची व पर्यावरणाची दखल घेण्याचं काम राज्याचा पर्यावरण विभाग विविध योजनांतून व उपक्रमांतून करीत असतो. पर्यावरण रक्षणात शासकीय उपाययोजना, पर्यावरण विषयक कायदे, व्यापक जनजागृती आणि सर्वसामान्य माणसाचा आग्रही सहभाग याकरीता पर्यावरण विभागाचे कामकाज अधिक गतीमान करण्यावर भर दिला जाईल, असं म्हैसकर यांनी यावेळी सांगितलं. 

हेही वाचा - भरती प्रक्रियेत कुणावरही अन्याय होणार नाही- नाना पटोले

मनिषा म्हैसकर यांनी शासनाच्या विविध विभागात काम करताना यापूर्वी राज्याच्या माहिती व जनसंपर्क महासंचालनालयाच्या महासंचालक म्हणून नावीन्यपूर्ण योजनांतून शासकीय कामकाजाच्या प्रसिद्धीला वेगळी दिशा दिली होती. विशेषत: लोकराज्य मासिकाचा वाचक वर्ग व लाखो प्रतींचं वितरण हे त्यांचं महत्त्वपूर्ण योगदान ठरलं.