व्हॉट्सअॅपच्या नव्या धोरणांमुळे अनेकांनी अन्य इन्स्टंट मेसेजिंग अॅप्सकडे मोर्चा वळवला आहे. त्यातही बहुतांश युजर्स हे त्यांचे व्हॉट्सअॅप अकाऊंट डिलीट करुन टेलिग्राम आणि सिग्नलसारख्या इतर मेसेजिंग अॅप्सवर शिफ्ट होण्याचा निर्णय घेतला आहे. त्याचा व्हॉट्सअॅपला जोरदार फटका बसला आहे.
गेल्या काही दिवसांमध्ये व्हॉट्सअॅप बंद करून सिग्नल किंवा टेलिग्राम अॅपवर युजर्स शिफ्ट होत आहेत. या महिन्यात नव्यानं अॅप्स इन्स्टॉल करण्याच्या बाबतीत व्हॉट्सअॅप पिछाडीवर आहे. तर टेलिग्राम आणि सिग्नल या दोन अॅप्सनी बाजी मारली आहे. या दोन्ही अॅप्सना युजर्सकडून चांगला प्रतिसाद मिळत आहे.
टेलिग्राम जानेवारी २०२१ मध्ये सर्वाधिक डाऊनलोड केले जाणारे नॉन गेमिंग अॅप ठरले आहे. जगभरातील टेलिग्रामच्या एकूण डाऊनलोड्सपैकी २४ टक्के डाऊनलोड्स हे भारतातून झाले आहेत. याबाबतचा खुलासा सेंसर टॉवरच्या लेटेस्ट रिपोर्टमध्ये करण्यात आला आहे.
जगभरात गेल्या महिन्यात (जानेवारी) ६३ मिलियन्स (६.३ कोटी) वेळा टेलिग्राम डाऊनलोड करण्यात आलं आहे. यापैकी १५ मिलियन्स (१.५ कोटी) डाऊनलोड्स एकट्या भारतात झाले आहेत.
टीक-टॉकनं सर्वाधिक डाऊनलोड केल्या जाणाऱ्या नॉन गेमिंग अॅप्सच्या यादीत दुसरे स्थान पटकावलं आहे. भारतात टीक-टॉक बॅन आहे. पण जगभरात या अॅपला चांगलीच पसंती मिळत आहे. टिकटॉकनंतर सिग्नल, फेसबुक आणि व्हॉट्सअॅप या अॅप्सचा अनुक्रमे तिसरा, चौथा, पाचवा क्रमांक लागतो.